🙏శరీమల్లికార్జున సుప్రభాతం
🌸🌿🌸🌿🌸🌿🌸🌿🌸🌿🌸
ప్రాతస్స్మరామి గణనాథమనాథబన్ధుం
సిన్దూర పూరపరిశోభితగణ్డయుగ్మమ్ ।
ఉద్దణ్డవిఘ్నపరిఖణ్డనచణ్డదణ్డ-
మాఖణ్డలాదిసురనాయకబృన్దవన్ద్యమ్ ॥ ౧॥
కలాభ్యాం చూడాలఙ్కృతశశికలాభ్యాం నిజతపః
ఫలాభ్యాం భక్తేషు ప్రకటితఫలాభ్యాం భవతు మే ।
శివాభ్యామస్తీకత్రిభువనశివాభ్యాం హృది పున-
ర్భవాభ్యామానన్దస్ఫురదనుభవాభ్యాం నతిరియమ్ ॥ ౨॥
నమస్తే నమస్తే మహాదేవ! శమ్భో!
నమస్తే నమస్తే దయాపూర్ణసిన్ధో!
నమస్తే నమస్తే ప్రపన్నాత్మబన్ధో!
నమస్తే నమస్తే నమస్తే మహేశ ॥ ౩॥
శశ్వచ్ఛ్రీగిరిమూర్ధని త్రిజగతాం రక్షాకృతౌ లక్షితాం
సాక్షాదక్షతసత్కటాక్షసరణిశ్రీమత్సుధావర్షిణీమ్,
సోమార్ధాఙ్కితమస్తకాం ప్రణమతాం నిస్సీమసమ్పత్ప్రదాం
సుశ్లోకాం భ్రమరామ్బికాం స్మితముఖీం శమ్భోస్సఖీం త్వాం సుమః ॥ ౪॥
మాతః! ప్రసీద, సదయా భవ, భవ్యశీలే !
లీలాలవాకులితదైత్యకులాపహారే !
శ్రీచక్రరాజనిలయే ! శ్రుతిగీతకీర్తే !
శ్రీశైలనాథదయితే ! తవ సుప్రభాతమ్ ॥ ౫॥
శమ్భో ! సురేన్ద్రనుత ! శఙ్కర ! శూలపాణే !
చన్ద్రావతంస ! శివ ! శర్వ ! పినాకపాణే !
గఙ్గాధర ! క్రతుపతే ! గరుడధ్వజాప్త !
శ్రీ మల్లికార్జునవిభో ! తవ సుప్రభాతమ్ ॥ ౬॥
విశ్వేశ ! విశ్వజనసేవిత ! విశ్వమూర్తే !
విశ్వమ్భర ! త్రిపురభేదన ! విశ్వయోనే !
ఫాలాక్ష ! భవ్యగుణ ! భోగివిభూషణేశ !
శ్రీ మల్లికార్జునవిభో ! తవ సుప్రభాతమ్ ॥ ౭॥
కల్యాణరూప ! కరుణాకర ! కాలకణ్ఠ !
కల్పద్రుమప్రసవపూజిత ! కామదాయిన్ !
దుర్నీతిదైత్యదలనోద్యత ! దేవ దేవ !
శ్రీ మల్లికార్జునవిభో ! తవ సుప్రభాతమ్ ॥ ౮॥
గౌరీమనోహర ! గణేశ్వరసేవితాఙ్ఘ్రే !
గన్ధర్వయక్షసురకిన్నరగీతకీర్తే !
గణ్డావలమ్బిఫణికుణ్డలమణ్డితాస్య !
శ్రీ మల్లికార్జునవిభో ! తవ సుప్రభాతమ్ ॥ ౯॥
నాగేన్ద్రభూషణ ! నిరీహిత ! నిర్వికార !
నిర్మాయ ! నిశ్చల ! నిరర్గల ! నాగభేదిన్ ।
నారాయణీప్రియ ! నతేష్టద ! నిర్మలాత్మన్ !
శ్రీ పర్వతాధిప ! విభో ! తవ సుప్రభాతమ్ ॥ ౧౦॥
సృష్టం త్వయైవ జగదేతరశేషమీశ !
రక్షావిధిశ్చ విధిగోచర ! తావకీనః ।
సంహారశక్తిరపి శఙ్కర ! కిఙ్కరీ తే
శ్రీ శైలశేఖరవిభో ! తవ సుప్రభాతమ్ ॥ ౧౧॥
ఏకస్త్వమేవ బహుధా భవ ! భాసి లోకే
నిశ్శఙ్కధీర్వృషభకేతన ! మల్లినాథ !
శ్రీ భ్రామరీప్రయ ! సుఖాశ్రయ ! లోకనాథ !
శ్రీ శైలశేఖరవిభో ! తవ సుప్రభాతమ్ ॥ ౧౨॥
పాతాలగాఙ్గజలమజ్జననిర్మలాఙ్గాః
భస్మతిపుణ్డ్రసమలఙ్కృతఫాలభాగాః ।
గాయన్తి దేవమునిభక్తజనా భవన్తం
శ్రీ మల్లికార్జునవిభో ! తవ సుప్రభాతమ్ ॥ ౧౩॥
సారస్వతామ్బుయుతభోగవతీశ్రితాయాః
బ్రహ్మేశవిష్ణుగిరిచుమ్బితకృష్ణవేణ్యాః ।
సోపానమార్గమధిరుహ్య భజన్తి భక్తాః
శ్రీ మల్లికార్జునవిభో ! తవ సుప్రభాతమ్ ॥ ౧౪॥
శ్రీ మల్లికార్జున మహేశ్వరసుప్రభాత
స్తోత్రం పఠన్తి భువి యే మనుజాః ప్రభాతే ।
తే సర్వ సౌఖ్యమనుభూయ పరానవాప్యం
శ్రీ శామ్భవం పదమవాప్య ముదం లభన్తే ॥ ౧౫॥
ఇతి శ్రీమల్లికార్జునసుప్రభాతం సమ్పూర్ణమ్ ।..🙏🌹🎻
🌸🌿🌸🌿🌸🌿🌸🌿🌸🌿🌸